Para, contra a violencia, recuperarmos a lingua

snlacorunha — Mon, 27 Oct 2008 18:28:33 +0000

O Servizo de Normalización Lingüística da Universidade da Coruña, o Servizo de Normalización Lingüística do Concello da Coruña e mais a Área de Normalización Lingüística da Deputación da Coruña organizamos a actividade “Para, contra a violencia, recuperarmos a nosa lingua” que terá lugar o 25 de novembro (25 de novembro, Día da Non-Violencia contra as Mulleres) a partir das 10.00 h na praza da Fariña (Azcárraga), A Coruña (na Cidade Vella)

O motivo da organización deste evento é o feito de que, en moitos contextos de contacto lingüístico, foron as mulleres -principalmente as das clases medias e elevadas- as que tiveron que abandonar a súa lingua propia para se adecuaren ao modelo de prestixio, o español.

Queremos aproveitar esta data para denunciarmos que esta sexa unha outra forma de violencia que debe ser erradicada para recuperarmos a nosa dignidade e manifestar publicamente o noso compromiso de nos construírmos, individual e colectivamente, na lingua propia deste país.

O acto consistirá nunha lectura pública. Convidámoste a participares e animámoste a que achegues por correo electrónico o teu propio texto enderezo electrónico snl@udc.es para, entre todas e todos, facermos efectivo este compromiso.

Bolsas de colaboración co SNL

snlacorunha — Mon, 29 Sep 2008 17:26:49 +0000

BASES DA CONVOCATORIA DE BOLSAS PARA PRÁCTICAS NO SERVIZO DE NORMALIZACIÓN LINGÜÍSTICA DESTINADAS A ESTUDANTES UNIVERSITARIOS/AS DO ÚLTIMO CURSO DE FILOLOXÍA GALEGA

1.OBXECTO

O obxecto da presente convocatoria é a concesión de dúas bolsas destinadas a estudantes para realizaren prácticas en tarefas que corresponden no desenvolvemento de funcións do Servizo de Normalización Lingüística.

2.SOLICITANTES

Poderán participar na presente convocatoria os/as estudantes universitarios do último curso de Filoloxía Galega ou aqueles/as aos/ás que lles queden un número de materias inferior a un curso para a finalizaren.
Non poderán concorrer as persoas que incorran nalgunha das causas de prohibición establecidas no artigo 13 da Lei 38/2003, xeral de subvencións.

3.LUGAR E PRAZO DE PRESENTACIÓN DE SOLICITUDES

As persoas solicitantes deberán presentar a solicitude debidamente cuberta, xunto coa documentación correspondente, no Rexistro Xeral do Concello da Coruña, ou por calquera dos medios dispostos no artigo 38 da Lei de réxime xurídico das administracións públicas e procedemento administrativo común. O prazo de presentación de solicitudes virá marcado no anuncio da convocatoria oficial.

4.DOCUMENTACIÓN

Os/as solicitantes deberán presentar a seguinte documentación:

4.1 Solicitude debidamente cuberta.
4.2 Datos académicos, en que se detallen os estudos cursados ou en curso, así como calquera precisión que se estimar necesaria. Achegarase unha fotocopia do expediente ou informe académico.
4.3 Fotocopia do DNI.
4.4 Currículo.
4.5 Memoria en que se expoñan os motivos e expectativas que levan a formular a solicitude, os coñecementos, capacidades técnicas e experiencia que alega, e tarefas ou calquera outro aspecto que desexaría realizar durante as prácticas, incluíndo a posible proposta de novos programas ou proxectos.

5. CONCESIÓN DAS BOLSAS

A concesión das bolsas realizarase por resolución do Concello da Coruña, por proposta dun tribunal que será nomeado e presidido pola concelleira de Mocidade, Solidariedade e Normalización Lingüística ou pola persoa en quen esta delegar.

O tribunal poderá acordar a realización de entrevistas persoais con todas as persoas solicitantes ou con parte delas.

Na selección das persoas beneficiarias das bolsas, teranse en conta os seguintes aspectos:

6.1 Memoria presentada polo/a solicitante.
6.2 Adecuación do currículo ás actividades que se van desenvolver.
6.3 Coñecemento e experiencia no manexo de aplicacións informáticas.
6.4 Expediente académico.

A resolución de concesión das bolsas publicarase no taboleiro de edictos do Concello. Contra esta resolución, que porá fin á vía administrativa, poderase interpor un recurso contencioso-administratrivo ante o Xulgado do contencioso-administrativo no prazo de dous meses, ou ben, potestativamente, un recurso de reposición ante a Xunta de Goberno Local no prazo dun mes. Ambos os prazos comezarán a contar desde o día seguinte ao da notificación, sen prexuízo de que as persoas interesadas poidan exercitar calquera outro recurso que estimen procedente.

7.RELACIÓN DOS/AS BOLSEIROS/AS CO CONCELLO DA CORUÑA

A concesión da bolsa non xera ningún tipo de vínculo laboral entre o Concello da Coruña e a persoa adxudicataria.

8.REALIZACIÓN DAS PRÁCTICAS

Os/as candidatos/as seleccionados/as realizarán as prácticas no Servizo de Normalización Lingüística (praza de María Pita, s/n, 2º andar).

A adscrición a actividades concretas, así como o horario das prácticas, serán decididos polos responsables do SNL, atendendo ás necesidades deste mais tendo en conta no posible as preferencias e as capacidades que a persoa solicitante expresou na memoria.

Ao rematar o período de prácticas, os/as bolseiros/as presentarán unha memoria das actividades realizadas. Pola súa banda, os bolseiros poderán solicitar ao Concello un certificado acreditativo da realización das prácticas, así como un informe de avaliación do SNL.

A dedicación ás prácticas deberá ser de 20 horas semanais. Logo do acordo coas persoas responsables do SNL, as horas de prácticas poderán acumularse en determinados días, co fin de deixar outros libres para asistir a clases ou a exames.

A duración do programa de prácticas será de 284 horas.

A axuda que recibirá o/a estudante é de 2.560 euros brutos, aos que se lles aplicarán as retencións correspondentes. O pagamento farase mensualmente, de xeito proporcional ao número de horas de prácticas realizadas no mes anterior.

As axudas cargaranse á partida 73.451.489.00 do orzamento en vigor.

9. PERDA DA CONDICIÓN DE BOLSEIRO/A

A condición de bolseiro/a extinguirase ao rematar o período sinalado no apartado anterior, así como por renuncia da persoa bolseira.

Así mesmo, o incumprimento por parte do/a bolseiro/a das obrigas a que se refiren as presentes bases serán causa da perda da bolsa para todos os efectos.

En caso de renuncia ou extinción da bolsa por incumprimento do/a bolseiro/a, este/a non terá dereito a percibir ningunha contía en concepto de axuda.

Se a renuncia do bolseiro for debida a causas de forza maior debidamente acreditadas, percibirá o importe da axuda proporcional ao período de prácticas realizadas.

Benvida ao blogue do SNL do Concello da Coruña

snlacorunha — Thu, 18 Sep 2008 16:40:51 +0000

Dámoslle a benvida ao blogue do SNL do Concello da Coruña. Esta páxina aínda está a dar os seus primeiros pasos, polo que lle pedimos desculpas.

Dentro dun anaco, esta páxina estará dispoñible.